BMU tələbələrinin yaradıcılıq sərgisi keçirilib



     Bakı Mühəndislik Universiteti (BMU), Abşeron Rayon İcra Hakimiyyəti və Yeni Azərbaycan Partiyası Abşeron Rayon Gənclər Birliyinin birgə təşkilatçılığı ilə Abşeron rayonu Heydər Əliyev mərkəzində  Ümummilli lider Heydər Əliyevin Azərbaycanda rəhbərliyinin 50 illiyinə həsr olunmuş “Heydər Əliyev - müasir Azərbaycanın qurucusu və memarı” mövzusunda BMU tələbələrinin yaradıcılıq sərgisi keçirilib.

     Memarlıq və İnşaat kafedrasının təşkil etdiyi sərginin açılış tədbirində universitet əməkdaşları ilə yanaşı Abşeron Rayon İcra Hakimiyyətinin başçısı İradə Gülməmmədova, Yasamal Rayon İcra Hakimiyyətinin başçısı Əziz Əzizov, millət vəkili Musa Quliyev, YAP Siyasi Şurasının üzvü, partiyanın Gənclər Birliyinin sədr müavini Samirə Quliyeva, YAP Abşeron rayon təşkilatının sədri Bilman Vəliyev digər təşkilatların rəhbərləri, ictimaiyyət nümayəndələri iştirak ediblər.

      İlk öncə tədbir iştirakçıları Ümummilli liderin abidəsi önünə gül dəstələri düzüb, hörmət və ehtiramlarını bildiriblər.

     Daha sonra qonaqlar Bakı Mühəndislik Universitetinin Memarlıq, Şəhərsalma və Dizayn ixtisaslarında təhsil alan tələbələrin əl işlərindən ibarət sərgi ilə tanış olublar.

    Qonaqları sərgi ilə tanış edən Memarlıq və İnşaat kafedrasının müdiri, əməkdar memar, professor Sabir Orucov sərgini BMU-da olan mühitin, əsasən də tələbə–müəllim münasibətinin bəhrəsi kimi xarakterizə edib. İnkişafımızın təməl prinsipləri kontekstində sərgidə Memarlıq və İnşaat kafedrasının müəllimlərinin və tələbələrinin yaradıcılıq işləri nümayiş olunub. Sərgi əsasən memarlıq layihələndirilməsi və onun əsasları, dizaynın əsasları, kompüter qrafikası, rəsm və rəngkarlıq sahələri üzrə təşkil olunub. 

    Daha sonra mərkəzin iclas salonunda keçirilən tədbirdə Abşeron Rayon İcra Hakimiyyətinin başçısı İradə Gülməmmədova Ulu öndərin Azərbaycanda rəhbərliyinin 50 illiyi ilə bağlı məruzə ilə çıxış edib. Bildirib ki, Heydər Əliyev hakimiyyətdə olduğu dövrlərdə daim Azərbaycan xalqına xidmət edib və müdrik siyasəti, dönməz əqidəsi və tarixi uzaqgörənliyi sayəsində milli dövlətçilik ideyasının gerçəkləşdirilməsinə, müasir Azərbaycan dövlətinin qurulmasına və xalqımızın müstəqillik arzusuna çatmasına nail olmuşdur.

    Daha sonra çıxış edən BMU-nun rektoru professor Havar Məmmədov ümummilli lider Heydər Əliyevin Azərbaycanda rəhbərliyinin 50 illiyi ilə bağlı geniş çıxış edib. Bildirib ki, Heydər Əliyevin uzaqgörən siyasəti nəticəsində Azərbaycan dünyanın inkişaf etmiş ölkələri sırasındadır. Bu gün də Ulu öndərin layiqli davamçısı, ölkə başçısı İlham Əliyevin rəhbərliyi ilə ölkəmizdə bütün sahələrdə sürətli inkişaf gedir, yeni innovativ texnologiyalı istehsalat müəssisələri açılır. Universitetdə müasir sənayenin tələbinə uyğun kadr hazırlığına önəm verildiyini diqqətə çatdıran rektor əlavə edib ki, digər universitetlərdən fərqli olaraq, Bakı Mühəndislik Universitetində Memarlıq, Şəhərsalma və Dizayn ixtisasları üzrə tələbələr qabiliyyət imtahanı vermədən universitetə qəbul olunurlar. Buna baxmayaraq, müəllimlərin zəhməti nəticəsində əldə olunmuş nailiyyətlər təşkil olunan sərgidə öz əksini tapıb.

     Tədbirdə çıxış edən digər natiqlər də Ümumilli liderin şəxsi keyfiyyətlərindən və Azərbaycan xalqına göstərdiyi xidmətlərindən söz açıblar.

     Tədbirin sonunda Ümummilli lider Heydər Əliyevin Azərbaycanda rəhbərliyinin 50 illiyinə həsr olunmuş sərginin təşkilində iştirak edən tələbələrə Fəxri fərmanlar təqdim edilib.

 

Digər xəbərlər

Bakı Mühəndislik Universitetində BDU-nun 100 illik yubileyi qeyd olunub
Ətraflı   22-Oct-2019
BMU-nun kafedra müdiri Keele Universitetində elmi müzakirələrdə iştirak edib..
Ətraflı   22-Oct-2019
“Proqramlaşdırmanın öyrənmə üsulları” mövzusunda təlim
Ətraflı   22-Oct-2019
NASA-nı təmsil edən planetar elmlər üzrə doktor Ann Verbişer BMU-da mühazirə oxu..
Ətraflı   21-Oct-2019