Mühəndislik fakültəsi

Fakültənin tarixi

    Mühəndislik fakültəsi 2016-cı ildə yaranıb. Yarandığı gündən Azərbaycan sənaye müəssisələri üçün mühəndis kadrlar hazırlayır. Fakültədə tədris Azərbaycan, rus və ingilis dillərində aparılır.

 

Fakültə haqqında ümumi məlumat

    Mühəndislik fakültəsində 18 bakalavr, 11 magistr ixtisası üzrə ümumilikdə 1980 tələbə təhsil alır. Fakültədə əcnəbi tələbələr də təhsil alır. Mühəndislik fakültəsində bakalavr ixtisası üzrə təhsil alan 6 tələbə Prezident təqaüdçüsüdür.

    Fakültədə 99 nəfər professor-müəllim və 29 nəfər texniki-köməkçi heyət olmaqla, 128 əməkdaş çalışır. Fakültənin pedaqoji heyətinə öz sahələri üzrə respublikada tanınmış təcrübəli müəllimlərlə yanaşı, gənc, dinamik, ölkəmizdə və xaricdə müxtəlif səviyyələr üzrə təhsil almış və ya beynəlxalq təcrübə keçmiş kadrlar da daxildir. Fakültə əməkdaşlarının bir qismi təhsillə bağlı respublika əhəmiyyətli layihələrdə iştirak edib və bu fəaliyyətlərini indi də davam etdirirlər.

    Fakültənin maddi-texniki bazası müasir tələblərə uyğun mühəndis hazırlığının həyata keçirilməsini təmin edir. Buraya texniki avadanlıqlarla təchiz olunmuş auditoriyalarla yanaşı, müasir tipli laboratoriyalar da – Yeni nəsil şəbəkələri laboratoriyası, Elektronika və mikroprosessor laboratoriyası, Analitik kimya laboratoriyası, Ümumi kimya laboratoriyası, Kimya mühəndisliyi laboratoriyası, Avtomatik nəzarət və adekvat modelləmə laboratoriyası, Mexanizmlər və maşın dinamikası laboratoriyası,  Daxiliyanma mühərrikləri və avtomobil laboratoriyası, Mexaniki vibrasiya və səs nəzarəti laboratoriyası, Təxribatsız sınaq üsulları laboratoriyası, Layihələndirmə laboratoriyası, Emal üsulları laboratoriyası, Material və metalloqrafiya laboratoriyası, Materiallar müqaviməti laboratoriyası, İstilik elmləri və istilik keçiriciliyi laboratoriyası fəaliyyət göstərir.

    Ölkədə müasir tələblərə cavab verən mühəndislər hazırlamaq üçün Mühəndislik fakültəsində texniki imkanlar, təcrübəli kollektiv və şəffaf mühit mövcuddur.

Mühəndislik fakültəsinin dekanı

T.ü.f.d., dos. Afər Sabir oğlu Əlifov

Əlifov Afər Sabir oğlu 1957-ci ildə Qusar rayonunda anadan olub. 1964-cü ildə Siyəzən şəhərindəki 1 saylı orta məktəbi bitirib. 1974-cü ildə Azərbaycan Politexnik İnstitutunun “İnşaat” fakültəsinə qəbul olub və 1979-cu ildə Azərbaycan İnşaat Mühəndisləri İnstitutunu bitirib. 1979-cu ildən etibarən təyinat üzrə “Azneftstroy” trestində çalışıb. Hərbi xidmətdən sonra 1982-ci ildə Azərbaycan İnşaat Mühəndisləri İnstitutunda əyani formada aspirantura şöbəsinə qəbul olub. 1984-cü ildə Leninqrad Politexnik İnstitutunda namizədlik dissertasiyasını müdafiə edib.

    1985-ci ildən pedaqoji fəaliyyətə başlayan Afər Əlifov 1985-2012-ci illər ərzində İnşaat mexanikası kafedrasında assistent, baş müəllim və dosent vəzifələrində işləyib. 1998-2002-ci illərdə Azərbaycan Memarlıq və İnşaat Universitetinin Magistratura şöbəsinin müdiri vəzifəsində çalışıb. 2002-2012-ci illərdə tikinti və layihələrlə bağlı müxtəlif özəl inşaat şirkətlərində çalışıb. Afər Əlifov 2012-2017-ci illərdə Türkiyənin Bartın Universitetinin İnşaat mühəndisliyi kafedrasında dosent vəzifəsində çalışıb. Pedaqoji fəaliyyət dövründə Əlifov Afər Sabir oğlu bakalavr pilləsində İnşaat mexanikası, Metal konstruksiyaları, Nəzəri mexanika, Dəmir-beton konstruksiyası, Əsaslar və özüllər, Archicad, Sap 2000 və magistr pilləsində isə Elastiklik nəzəriyyəsi, Plastiklik nəzəriyyəsi, Qurğuların dinamikası kimi dərsləri tədris edib. Afər Əlifov 4 tədris metodik vəsaitin, 80 yerli və xarici elmi məqalənin müəllifidir. 7 nəfərin fəlsəfə doktoru və 10 nəfərin magistr dissertasiya işlərinin elmi rəhbəri olub.

 


Dekan müavinləri:

Elmi işlər üzrə dekan müavini - dos. Vüqar Muradov

Tədris işləri üzrə dekan müavini - dos. Pərviz Məmmədov

 

Kafedralar:

Kompüter və informasiya texnologiyaları 

Avtomatika və elektroenergetika 

Mexanika mühəndisliyi

Sənaye mühəndisliyi

 

İxtisaslar:

Elektroenergetika mühəndisliyi

Maşın mühəndisliyi

Elektrik mühəndisliyi

Proseslərin avtomatlaşdırılması mühəndisliyi

Mexanika mühəndisliyi

Kompüter mühəndisliyi

Sənaye mühəndisliyi

Ekologiya mühəndisliyi

İnformasiya texnologiyaları

Sistem mühəndisliyi

Logistika və nəqliyyat texnologiyaları mühəndisliyi

 

 

 

Memarlıq və inşaat fakültəsi:

 

Kafedralar:

Memarlıq və dizayn

İnşaat mühəndisliyi 

Kimya mühəndisliyi

Ümumi fənlər

 

İxtisaslar:

Dizayn

Memarlıq

İnşaat mühəndisliyi

Mühəndis sistemlərinin və qurğularının tikintisi mühəndisliyi

Nəqliyyat tikintisi mühəndisliyi

Şəhərsalma

Kimya mühəndisliyi

 

Tələbələrin uğurları